英超护级形势劲乱，喺剩低10轮情况下，除榜尾西布朗稍稍被抛甩外，由第9位嘅爱华顿到「尾2」嘅史笃城都只得8分差距，边队降班有排估！今晚几支护级兵正面交锋，场场「6分波」，肯定斗到血肉横飞！
屈福特剪布有保证
屈福特主场对包尾大幡西布朗，西布朗可以话形势最恶劣，同「安全线」嘅水晶宫仲差7分，而且近5仗联赛1和4负，状态劲曳，新兵史杜列治加盟冇耐又要长抖，季中接手嘅「舞王领队」柏杜就算跳埋回魂舞，都难救西布朗出火海。主队屈福特虽然表现飘忽，不过间唔中畀到球迷惊喜，尤其近4仗主场3胜1和，仲曾以4比1赢过车路士，质素较有保证，少让平半1.81倍上盘捧得过。
修咸顿大军围城
修咸顿主场面对「尾2」史笃城，「圣人」排名虽然高3级，查实分数仅多1分，加上修咸顿未来赛程多为作客，仲要兼顾足总盃，趁主场必抢攻争取入波。作客嘅史笃城护级倚重梳顿沙基利，佢近3仗场场射入关键入球，状态弗爆，加上近期作客频开大，近5仗4次开3球或以上，呢场肯定唔会死守放手一搏，中位数2.5球嘅大盘，有2倍回报唔好错过。
史云斯靠主场爆锤
「尾3」史云斯坐镇自由球场迎战「锤仔」韦斯咸。「天鹅」人脚唔算标青，但喺葡萄牙主帅卡路士卡维奴带领下，近6主场录得全胜，仲曾先后击败过利物浦同阿仙奴两支「Big 6」，摆明主场演出有把握，今仗更有前「锤仔帮」阿休倒戈相向，面对近3仗作客输晒嘅韦斯咸，史云斯为早日脱离降班区减压，必借主场威力擸晒3分，1.76倍平手盘必捧主队。
