积分榜畀马体会追到裤甩
今晚西甲爆发榜首大战，榜首巴塞隆拿喺主场火併「二哥」马德里体育会。巴塞近期喺联赛频频失分，搞到畀马体会愈追愈近，实在不容再失，好彩每逢联赛交锋经常食住马体会，王牌美斯更加系对手嘅剋星，巴塞为将积分甩开巩固「一哥」位必搏尽，主胜有计。
原本一枝独秀嘅巴塞，近期喺联赛表现开始有啲Hea，虽则依然保持不败金身，但近5仗只得2胜3和失左6分；相反马体会就联赛6连胜，追吓追吓依家只落后5分，如果巴塞今仗有乜依郁输波嘅话，双方差距就会缩窄至2分，令到本来稳袋嘅联赛冠军出现暗涌，因此「地上最强」必定全力争胜。儘管马体会近年喺欧联成日剋住巴塞，不过返到联赛就系另一回事，单计近7次联赛交手，巴塞取得5胜2和不败佳绩，明显喺联赛食住「床单兵团」。
美斯特别顺基沙文捧蛋
而且马体会堪称巴塞王牌美斯「第2至爱嘅西甲球队」，点解咁讲？因为美斯曾27次攻破马体会大门，包括3次大演帽子戏法，马体会系畀呢位阿根廷球王入波第2多嘅西甲球队，所以对亲佢的都零舍醒神。相反，周中对雷加利斯食出大四喜嘅马体会射手基沙文，每次造访巴塞嘅鲁营球场例脚软，无论系效力皇家苏斯达定马体会，先后11次作客鲁营比赛，结果全部食白果，仲要只得2和9负未赢过，两军王牌表现高下立见。巴塞为免除后患，必趁机赢波甩开马体会，主胜不容错过。
