周一凌晨意甲独脚戏，ＡＣ米兰将会和国际米兰上演同市打吡。米兰双雄共享同一座圣西路球场，因此两队聚头例必打到火花四溅，今次轮到ＡＣ米兰挂名主场，战况肯定唔会例外，尤其ＡＣ米兰近期回勇势头一时无两，联赛近3主场仲大获全胜，各项赛季近6仗仲未失过波，呢场面对进攻疲弱的国米，赢面肯定较高，平手盘肯定捧番ＡＣ米兰。
ＡＣ米兰新帅加度素季中接手球队开局其实唔算顺利，仲曾经一度畀人质疑佢唔够班做红黑军团嘅掌舵人，不过路遥知马力，球队近排表现渐入佳境，而加度素向球迷力证自己嘅执教能力之馀，亦成功带领球队摆脱季初飘忽嘅表现，联赛近8仗取6胜2和不败战绩。班波走势咁劲，全因主帅加度素够胆起用一班自家青训出身嘅年轻球员，除左有已经为人熟悉嘅后生门神基安卢基当拿隆马，帮助球队近6仗力保不失之外，仲有年仅20岁嘅前锋柏德列古度尼，佢今季多次为球队射入关键波，包括上仗联赛面对强敌罗马为球队先拔头筹，ＡＣ米兰前后场都有质素唔错嘅后生仔担大旗，呢场打吡战有力取胜。
国米锋线弱难破关
国米早前虽然终结长达8轮嘅联赛不胜纪录，不过球队锋线疲弱嘅问题依然严重，上仗面对联赛包尾嘅宾尼云图，都只系靠两个后卫挺身而出入波，先可以全取3分，加上前锋莫路伊卡迪岩岩伤愈复出，状态未必咁快可以恢复，面对防守表现明显有改进嘅ＡＣ米兰，攻力欠奉嘅国米难有本钱破门，呢场平手盘都系捧番ＡＣ米兰较稳阵。
