防线齐脚顶得住慢热红魔
周二凌晨英超独脚戏，水晶宫主场挑战「红魔鬼」曼联。水晶宫近期伤兵情况严重，尤其系前线人脚捉襟见肘，好在呢场有两大后防主力及时复出，面对实力高一筹嘅红魔够料死守，况且曼联喺客场不嬲慢热，水晶宫随时藉地利顶得两嘴，半场和有2.2倍博得过。
水晶宫自老帅鹤臣季中接手后，表现回勇绝对系有目共睹，不过佢的似乎黑气未除，班主力轮住嚟打柴，人数之多几乎够砌队「伤兵Eleven」，搞到鹤臣头都痕！尤其进攻核心韦费特沙夏，呢位科特迪瓦射手季初倦勤多场之后，踢左一排喺上个月又伤过，好彩有消息指佢恢复进度超乎预期咁快，唔使几耐就可以复出，不过就未必赶得切呢场。
反而后防方面，2位主力后卫马田基利同舒洛比都伤愈有望披甲，令防线有番啲保障，而且水晶宫今季喺主场屡有佳作，包括逼和「1哥」曼城，仲击败过车路士，上仗同热刺都系斗到临完场前先失波，可见班波质素唔差，有力同Big 6周旋。
曼联作客冇霸气
另边厢，多得领队莫连奴嘅保守战术，曼联作客踢落同中下游球队无异，攻力弱到吓亲人，近7场客战上半场只入2球，上周中欧联作客西维尔就见晒底，畀对手揿住砌，若非门将迪基亚屡作「神救」，绝无可能闷和0比0！咁消极踢法自不然引起唔少魔迷诽议，之不过莫连奴叫得做「寸王」，边有咁容易妥协！加上新兵阿历斯山齐士加盟咁耐喺前场都唔系好帮得手，仲似乎「上脚」太多，有破坏球队进攻节奏之嫌，前线有阻滞睇怕曼联都好难咁快取得入球，半场和值博。
