至于欧霸冠军大热门马德里体会会，喺今晚16强首回合主场硬撼俄超「1哥」莫斯科火车头。「床单兵团」刚于联赛同巴塞激战一场，最终输波兼搏得太尽未回气；至于火车头客场出击相信会稳阵行先，今仗唔慌多波入，一于捧中位数2.5球细盘。
从欧联降格踢欧霸嘅马体会，喺众多球队之中确实超晒班，上圈两回合计大胜丹麦球队哥本哈根5比1，难怪依家以3.3倍升格为夺冠大热，何况主帅施蒙尼喺2012年接手「床单兵团」之时，正系该年勇夺欧霸打响名堂，今届当然想重温旧梦。不过马体会喺日前联赛嘅榜首大战，作客以0比1输畀巴塞隆拿，畀对手甩开8分，令争夺联赛冠军机会渺茫之馀，嗰场波众将亦搏到好尽，未必咁快回得切气，所以预计今场唔会急于抢攻。
火车头作客睇定嚟踢
另一边厢，莫斯科火车头乃俄超「1哥」，日前联赛刻意收起法芬、阿里等多名主力，摆明留力今仗同马体会鍊过，而且莫斯科火车头客场出击例必踢得保守，近5仗欧霸作客只系入5球，当中有4仗开出两球或以下，加上今仗要造访大热门马体会，相信一定踢得更加小心翼翼，预计战况会处于胶着，转捧2.5球细盘更为上算。
