阿苏停赛见好就收
西甲好戏停不了，周日晚就有巴塞隆拿主场迎击毕尔包。「1哥」巴塞今季可以维持到高水准演出，主帅华尔维迪重视防守嘅踢法功不可没，现时球队有8分领先优势，近期排阵更见以稳阵行先，呢场仲有射手苏亚雷斯停赛，中位数3.5球入球细又点可以错过？
欧洲各大联赛都进入最后直路阶段，西甲都唔例外，嚟到最后10轮，但巴塞依然系4大联赛之中唯一一支不败之师，纵使唔少人都会觉得有「球王」美斯坐镇，巴塞可以喺西甲打横行，「不败」其实冇乜大不了，但系佢的咁巴闭绝非美斯一人之功，尤其唔可以忽视教练华尔维迪！事关佢一手「凑大」嘅乌姆迪迪今季大熟大勇，24岁仔已经成为后场不可或缺嘅主力，加上原本嘅碧基、佐迪艾巴一班星级后卫，成功改善球队防守层面上嘅问题，令后防不时「派胶」嘅巴塞，变得「有前有后」，难怪可以喺联赛榜放甩成条街，仲系今季西甲失波第2少嘅球队，劲到冇朋友。
华尔维迪识玩留放
事实上，华尔维迪喺轮换留放都有一手，自球队踏入2月，由于积分上有优势兼欧联重开，除左不时收起美斯，好多时赢到一、两球就收手，所以近8仗联赛有7次开3球或以下，而唯一一次大炒，就系基罗纳「唔识死」先开纪录，巴塞随即「挞着」连入6粒，况且今仗巴塞射手苏亚雷斯要停赛，估计入波唔慌多。
另一边厢，毕尔包攻击力劲差，近7仗联赛有4次交白卷，根本冇力攻破巴塞嘅超强防线，但喺防守方面，佢的近17仗联赛未失多过2球，仲试过以0比0闷和皇马，表现都算硬淨，今仗造访鲁营球场未至于会大败，中位数3.5球嘅入球细坚好路！
