福仔马迪尔照完肺必搏
英超周五凌晨补赛，「锤仔帮」韦斯咸主场迎战「2哥」曼联。「红魔」前场两位年轻球员拉舒福特同安东尼马迪尔上仗冇货交畀人闹爆，呢场肯定会搏尽踢争气波，另外韦斯咸护级成功，冇晒心理包袱肯定踢得特别醒神，尤其锤仔帮以往对亲Big6球队都演惯大骚，今场对攻战走唔甩，大细中位数2.5球，1.85倍入球大捧得过。
红魔主力前锋卢卡古早前受伤要长抖，领队莫连奴近排就畀足机会两位小将拉舒福特同安东尼马迪尔担正，不过佢两个冇乜料到，尤其上仗输畀白礼顿一役，「福仔」一味扭来扭去，完全唔识配合；安东尼马迪尔喺场上又好似游魂一样，激到寸王生虾咁跳，赛后忍唔住暗寸部分球员嘅表现。不过正印前锋卢卡古继续倦勤，呢两位前锋为争上位，而且仲要争入世界盃国家队大军名单，点会放弃表现自己嘅好机会呢？今场二人为一吐乌气，肯定会落力争取入波。
韦斯咸冇包袱斗攻
另一边厢，锤仔帮上仗2比0击败李斯特城攞够分护级，总算保住来季英超席位；今场冇压力之下，班波肯定踢得更放，尤其今季联赛攻入10球并交出5次助攻嘅前锋阿拿奥杜域，已经多次证明自己实力超班，上轮就助攻队友祖奥马里奥入波，状态大勇，搭住今场倒戈嘅前红魔射手查维亚靴南迪斯，韦斯咸要入波绝对冇难度。加上锤仔帮近4仗联赛对Big 6球队，就有3次开3球或以上，斗攻格局一于捧入球大。
