德甲今晚煞科，虽然拜仁慕尼黑已经提早夺冠，但前4争夺依然刺激，目前同得52分嘅贺芬咸同利华古逊喺最后一战都主场出击，势必全力向欧联入场券展开衝刺。
利华古逊目前排第5，同第4嘅贺芬咸同分，但得失球差落后3球，今晚主场要赢之馀仲想大胜，遇上无欲无求嘅汉诺威睇落大胜机会唔低，不过利华近3场联赛1和2负仲要1球都入唔到，状态明显下滑，今场仲有首席射手禾兰停赛，前线要靠艾拿利奥同老将杰斯宁施高袭。不过将于下季转会史浩克嘅汉诺威中坚沙利夫辛尼出名系「空中霸王」，今季空中争顶顶赢220次，排德甲球员第1名，利华嘅空袭未必攞到着数。
杰斯宁告别利华赢两粒？
效力利华古逊已经12年嘅34岁老将杰斯宁，已经决定踢埋今仗挂靴，相信利华点都会畀啲时间佢上阵作告别战，不过佢今季只曾后备上阵7次，未交出任何建树，好在球队伤兵问题已有改善，主力宾达兄弟同庄拿芬泰希都可以复出，防线稳阵好多。汉诺威已经上岸，但上轮大破哈化柏林所见，防线依然保持良好纪律，佢的实力虽然较弱，却胜在战意十足绝少大败，球队踏入今年16场联赛虽然输左半数，但除左对大超班嘅拜仁外，其馀7场败仗都系1球起两球止，利华今晚有主场都唔会赢得好多，「让球主客和」利华让到两球嫌太辣，中位数3.5球嘅大盘又热到得1.58倍冇分头，黑柴建议以小博大，敲有4.25倍嘅「让球和」。
