尼马又话伤实匿埋
今晚喺利物浦中立场上演嘅国际热身赛，巴西将会硬撼「格仔兵团」克罗地亚，好番冇耐嘅森巴王牌尼马有传又伤，今仗或会避战，好彩仲有菲腊比古天奴、「耶稣仔」加比尔捷西斯等撑住，况且「格仔兵团」近年对亲南美球队都冇运行，客胜有计。
讲到巴西，大家最关心系王牌尼马嘅伤势，呢位圣日耳门前锋自2月因右脚蹠骨受伤提早收咧后，抖左3个月已经好番晒，不过喺日前操练中，忽然坐低除鞋畀军医检查佢右脚，之前佢都讲过如果觉得有乜唔妥就会停一停，费事再伤影响出战世盃，今仗随时避重就轻再抖抖。虽然尼马未必出得，但巴西中前场仲有菲腊比古天奴、韦利安同加比尔捷西斯担大旗，上场热身赛对德国，就系靠韦利安助攻畀「耶稣仔」一箭定江山，一洗4年前世盃惨败畀德军1比7嘅奇耻大辱，呢2位英超兵同曾效力利物浦嘅古天奴熟晒地头，今仗犹如有地利之助，表现更佳。
克罗地亚最怕南美波
另一边厢，克罗地亚中前场主力呈现老化，队长莫迪历、拿杰迪锡、文迪苏杰及比列锡等都年届三十，活力点都差啲，今届好大机会系佢的最后一次参加世盃，嚟紧决赛周连场硬仗，点都重要过今仗拍跳，呢班老将难免有所保留。而且「格仔兵团」近5次出战南美球队，喺法定时间只得1和4负未赢过，包括2次输畀今仗对手巴西，摆明畀森巴兵食住喇，今仗凶多吉少，客胜好路。
