世盃F组德国同瑞典坚持踢整体机动足球，都系名牌球队剋星。记得德国上届决赛周4强战，7比1炒大热门兼东道主巴西，震惊世界；瑞典今届外围赛嘅分组赛同附加赛，分别踢走两支传统劲旅荷兰同意大利，随时喺F组携手出线。
整体之王强势卫冕
德国挟外围赛10战全胜而临，凭优异历史战绩、超强稳定性同先进战术理念，呢支世界排名第一劲旅喺俄罗斯力争成为史上第二支蝉联球队（巴西曾于1958及1962连夺冠军），已集有利条件于一身。
德国领队勒夫自2006年世盃结束后正式带领德国队，但该届喺德国主办嘅世盃决赛周，佢以助教身份协助领队奇连士文，事后「奇哥」都话比赛嘅战术思想主要都系嚟自勒夫，结果德国喺自己地头获得季军，之后两届世盃勒夫掌帅印后分别获得季军同冠军，今次实际上系佢第4度领军踢决赛周，讲经验绝对系无人能及。
超新星涌现更胜上届
德军今次保留左包括汤马士梅拿、却奥斯等9名上届冠军功臣，再注入甘美治、迪姆华拿等超新星，加上近年多次不幸喺大赛前受伤嘅马高列奥斯终于可以健康参战，实力同兵源更胜去届，既然上届佢的喺巴西地头都可以大比数羞辱主队，今次喺俄罗斯作赛地域上更有利，夺冠呼声数一数二。
务实领队倒米赶客
瑞典领队赞尼安达臣，绝对系俄罗斯世盃组委会眼中钉，因为佢不断同今届决赛周赶客，先喺A组分组赛抢走粉丝多箩箩嘅荷兰次名出线席位，去到附加赛仲将原本拥有保方、巴洛迪利同邦路斯等吸睛巨星嘅意大利踢埋出局，已经令到主办单位同球迷相当冇瘾。点知赞尼安达臣继续唔理球迷感受，连瑞典最受球迷喜爱嘅「吕布」伊巴谦莫域伤愈后毛遂自荐想入队，都唔领情置之不理，进一步削弱左今届决赛周嘅话题性同吸引力，呢位倒米领队认真唔识做。
科斯贝治反击核心
瑞典今届人脚名气平平，赞尼安达臣手中筹码唔多，都婉拒伊巴谦莫域嘅好意，主因系伊巴归队好自然会成为全队倚赖嘅核心，打乱左整体战部署，同时亦担心佢顶唔住高强度嘅世盃激战。不过，瑞典防线纪律同默契一流，稳守突击战术熟练，效力德甲莱比锡嘅大脑科斯贝治火速上位，呢位新星盘传射都有上佳造诣，仲系死球专家，瑞典经常靠佢扭转局面，遇上墨西哥绝有力一战！
