世界盃有种球队堪比「小强」，佢的作风顽强，死缠烂打踢法每每令强队束手无策，今日介绍嘅哥斯达黎加同瑞士就系呢类「小强」！由于E组有热门巴西喺度，呢两队相信会以次名为目标，誓显「不死生命力」！
巨人杀手炮製惊喜
哥斯达黎加喺4年前嘅巴西世盃担演巨人杀手角色，分组赛力压3支名牌乌拉圭、意大利同英格兰，爆冷首名出线，16强再淘汰希腊杀入8强，最后同「橙衣军团」荷兰互射12码仅负出局，其经历足以写成一个传奇故事，呢队中美洲小国名气欠奉但胜在实际，随时再为球迷带来惊喜。
基罗拿华斯撑起防线
所谓弱旅出钢门，要成为巨人杀手，首先就系唔失波，「金句王」黄兴桂都讲过：「一个好龙门能将输变和，再由和变赢」哥斯达黎加就有位「神龙」在阵。基罗拿华斯上届世盃上阵5仗，有3场保持清白，3度当选赛事最佳球员，更系「金手套」3大候选人之一，最后仅输畀当届冠军德国钢门纽亚，出色表现令佢获皇家马德里赏识。
钢门同一条烂打防线令列强头痕，哥斯达黎加突击亦相当煞食，双箭头拜仁雷斯同祖尔甘保就系球队数胡人物。32岁嘅队长拜仁雷斯效力士砵亭，属上届世盃8强功臣之一，喺国家队担任进攻中场及影子前锋，今届外围赛就为球队攻入3球。
至于效力贝迪斯嘅祖尔甘保衝刺力强，25岁属当打之年，今届外围赛大炒美国4比0一役，佢后备上阵即梅开二度，不过呢位射手今季曾受重创，养伤近3个多月，至今未回复最佳水平，主帅奥斯卡拉美利斯希望借近期热身赛，催谷番起佢嘅状态。
海外兵团力求突破
瑞士相信系今届赛事世界排名最高嘅冷门，其世界排名高踞第6，外围赛10战9胜，但关键一战失利而屈居葡萄牙之下，要靠附加赛压倒北爱尔兰亮相俄罗斯决赛周。瑞士近几届世盃四平八稳，但未能突破16强呢个「樽颈位」，今次点兵以外流球员为主，睇吓可唔可以打破宿命！
瑞士外围赛被编入弱组，同组只得葡萄牙一支强队，因此瑞士能取得9连胜，其实力处于一线尾、二线头水平，不过稳阵踢法经常令对手叫苦连天，好似上届16强面对南美劲旅阿根廷，瑞士力战到加时完场前两分钟先失守，虽败犹荣，两年前嘅欧国盃分组赛亦能够打和法国，可见瑞士战斗力唔曳。
格列沙加举足轻动
瑞士今次23人大军，有多达22人喺国外搵食，当中3位门将同时喺德甲献技，后防就倚重刚刚由祖云达斯转投阿仙奴嘅列治史迪拿及AC米兰铁卫列卡度洛迪古斯，中场由阿仙奴嘅格列沙加担大旗，呢位25岁中场日渐成熟，上届世盃已获徵召，并对法国一仗射入1球，两年前欧国盃更踢足4场，今届外围赛射入7球，表现举足轻重，虽然沙加近期受膝患困扰，好在证实赶得切决赛周前康复，可以为国披甲。
前线焦点球星要数到「矮脚虎」梳顿沙基利，26岁嘅佢今季为史笃城攻入8球，可惜球队仍要降班，呢位绰号「阿尔卑斯山美斯」嘅箭头，究竟系真材实料定系得啖笑，今届将成佢证明自己嘅最佳舞台。
