黄金中场誓响头炮
周日凌晨世盃D组首轮赛事，克罗地亚将会喺加里宁格勒面对尼日利亚。近年世盃常客「超霸鹰」尼日利亚，过去3次出战决赛周初期表现都比较慢热，分组赛首战经常一胜难求，相反对手克罗地亚有「黄金中场线」强势压阵，赢面高几班，主胜捧得过。
克罗地亚阵容鼎盛，尤其以莫迪历同拿杰迪锡为首嘅中场线，实力绝对可以话系豪华级。2年前嘅欧国盃决赛周，克罗地亚就试过喺分组赛力压劲旅西班牙，以首名出线，与尼日利亚嘅慢热形成强烈对比，佢的岩岩喺友赛就试过以2比1，反胜另一支有份出战决赛周嘅非洲代表塞内加尔，呢场绝对有力打响头炮。
尼日利亚最怕欧洲球队
近年多次成功闯入世盃决赛周嘅「超霸鹰」，今届喺深谙非洲足球嘅德国主帅卢亚带领下，再次登上呢项大赛舞台，绝对系其中一支值得关注嘅非洲劲旅。尤其香港球迷不嬲睇开英超波，对尼日利亚阵中主力肯定唔会陌生，皆因包括队长约翰米基尔、中场尼迪迪同前锋伊恩拿祖，都有过丰富英超揾食经验，其中世盃初哥伊禾比，将会被委以「超霸鹰」取胜重任，不过呢位22岁嘅阿仙奴生牯仔，大赛经验依然比较缺乏，未必有力胜任。加上非洲球队倾向各自为战嘅踢法，去到世盃舞台根本难有优势，「超霸鹰」近4仗热身赛先后输畀塞尔维亚、英格兰及捷克，摆明畀欧洲球队剋死。
