东欧太极王遇擅守十字军
今晚另一场世盃E组次轮赛事，由塞尔维亚硬撼瑞士。塞尔维亚首仗旗开得胜，今仗一定稳打稳扎，呢班波防守大过天，早已失去前南斯拉夫嗰种「欧洲巴西」嘅风格，面对「同道中人」嘅瑞士，大家先求稳阵斗「耍太极」，半场和更值博。
塞尔维亚虽然系由前南斯拉夫分裂出嚟，但呢支由高拉洛夫、伊云洛域、尼曼查马迪、米利禾积域等悍将为重心嘅球队，防守大过天，完全冇晒前南斯拉夫嗰种「欧洲巴西」嘅秀丽进攻，今届首仗面对哥斯达黎加，喺全场略为佔优下，只靠老将高拉洛夫嘅招牌罚球，才打破僵局赢1比0，闷到发慌。由于众将均集中做防守，搞到单箭头阿历山大米祖域经常冇波到脚，孤掌难鸣，难怪攻力咁疲弱喇。
瑞士近7仗仅失2球
另一边厢，「十字军」瑞士首仗落后之下逼和巴西1比1，甚有防守纪律，中前场无论系梳顿沙基利、迪斯马利、施费洛域，都会勤于做抢截及回防助守，下季加盟阿仙奴嘅右闸列治史迪拿，上仗更将「森巴球王」尼马盯到一戙都冇，连热身赛在内，瑞士近7仗只系失左2粒咁大把，真系密不透风。不过针无两头利，擅守嘅「十字军」火力麻麻，尤其系面对同级对手，反而老鼠拉龟冇碇埋手，近5次面对欧洲球队仅入3球，有办你睇。
现时塞尔维亚以3分排E组榜首，领先巴西及瑞士2分，今仗一定稳打稳扎，佢的近8仗有6次开半场和，预计两支「同道中人」初段都系斗玩拉布，半场和值得再追。
