尼马誓雪伦奥败辱
今晚世盃16强重头戏，夺标热门「森巴兵团」巴西强战「仙人掌国」墨西哥。巴西表现愈来愈弗，王牌尼马入波助攻瓣瓣有，明显已摆脱伤患逐渐上力，何况墨西哥仍受16强魔咒困扰，尼马誓要率领「森巴兵团」，报番6年前伦敦奥运嘅一箭之仇兼杀入8强，让球盘要让一球都冇有怕，照捧巴西上盘。
自从今年2月受伤后，岩岩好番嘅巴西王牌尼马状态令人担心，尤其系佢畀人轻轻一撞即跌狂碌地，呢啲片段甚至畀网民恶搞添，但你咪理，呢位圣日耳门前锋先喺对哥斯达黎加临尾开斋，上仗对塞尔维亚又角球助攻堤亚高施华顶入，表现渐入佳境，连同好拍档菲腊比古天奴已入2粒，配合韦利安、加比尔捷西斯等锋将，火力极为可靠，中前场嘅控球能力，亦令防线的压力大大减少。巴西喺今届E组3仗分组赛以2胜1和获首名出线，入5球仅失1球，攻守俱有水准，便是最佳例证。
墨西哥难逃16强出局魔咒
另一边厢，墨西哥今届同样出色，喺F组分组赛取得2胜1负，包括击败上届盟主德国，不过喺末轮惨吞瑞典3蛋，痛失首名资格之馀更几乎出局，可见墨军状态比较飘忽，后卫赫达摩兰奴今仗要坐波监，实力受削。「仙人掌国」近届世盃往往能于分组赛突围而出，但每次去到16强总系见晒底，之前6届均于16强出局，近5届中更有4次喺法定时间内输波，包括上届领先之下，末段连失2粒反输畀荷兰，紧张关头经常甩辘，仍未摆脱16强魔咒。
虽然巴西喺2年前终于打破宿命，首尝奥运足球金牌滋味，但其实佢的早喺2012年就有机会封王，可惜由尼马、堤亚高施华率领嘅「森巴奥运兵」，喺伦敦奥运决赛爆大冷以1比2不敌墨西哥，呢场败仗对尼马影响甚深，现时「仙人掌国」阵中仲有9名当年嘅奥运成员，其中赫达靴里拉、卡路士沙些度等系担正添，巴西誓要一雪前耻。何况两军近6次交手，巴西取得4胜1和1负，4场胜仗中有3次赢2球或以上，无论状态、经验、往绩及实力均远胜墨西哥，让球盘巴西要让一球，上盘捧得过。
