卡尼带出热到烫手
世盃8强全部诞生，除冠军外，今届神射手之争亦进入白热化阶段，英格兰前锋哈利卡尼一枝独秀，暂以6球高踞射手榜榜首，但佢现时获神射手嘅足智彩赔率热到得1.11倍，未必适合想「刀仔锯大树」嘅球迷。查实除左卡尼之外，其馀几支晋级球队嘅射手整体表现都唔曳，随时一场波就可以扭转成个形势！
过去几季都喺英超攞神射手嘅哈利卡尼，上季虽然输左畀利物浦嘅穆罕默德沙拿，不过卡尼依然成功打破自己联赛入球纪录，仲将好脚风带到去今届世盃舞台。睇番近年世盃神射手往绩，除左「大哨」朗拿度喺2002年以8球夺得呢项荣耀之外，由1978年阿根廷前锋甘巴斯开始，到上届哥伦比亚嘅占士洛迪古斯，世盃神射手得主都入唔多过6球，可见暂时已经斩获6球嘅哈利卡尼，确实热得有理。
除左呢位大热嘅「三狮」射手之外，其馀列强都仲有唔少实力猛将，有力后上竞逐呢项殊荣。当中咬得最紧嘅肯定系比利时前锋卢卡古，佢暂时同葡萄牙嘅C朗拿度同样射入4球，不过由于葡萄牙已经出局，对卡尼威胁最大非呢位「曼联魔兽」莫属。另外法国攻击手基利安麦巴比，今届暂时轰入3球，16强面对阿根廷更梅开二度，可见呢位年仅19岁嘅前锋喺淘汰赛冇话怯场，如果大家嫌哈利卡尼太热嘅话，11倍嘅卢卡古及17倍嘅基利安麦巴比都系好分头之选。
「其他」注项包晒俄国孖宝
若果想再好分啲，不妨考虑有50倍嘅「其他」，因为已包含俄罗斯两大入球泉源迪斯尤巴及卓利舒夫，两位暂时同样有3个入波，加上俄罗斯8强面对年纪偏大嘅克罗地亚，以俄国行军之快速，两位随时又有入球进帐，相当值博。
