老将玩拉布Vs谨慎唔乱搏
周四凌晨世盃4强大战，克罗地亚将会喺莫斯科路斯尼基球场，同英格兰争夺决赛席位。老将当家嘅「格仔军团」，连续2场淘汰赛都要踢到互射12码先分到胜负，体力消耗大冇咁快回到气，呢场随时拉住布踢，另外英格兰主打稳守突击，为争取52年嚟再次杀入决赛，呢场都唔敢冒进，宁愿捧半场和好过。
有莫迪历同拿杰迪锡呢两位顶级中场压阵嘅克罗地亚，中场线堪称系豪华级别，今届佢地就多次展示出色嘅个人能力，喺攻守两方都成为「格仔军团」嘅绝对核心，过去两场淘汰赛面对丹麦同俄罗斯，两人都同对手斗足120分钟，可见领队达历十分倚重呢两位分别喺皇家马德里同巴塞隆拿两支西甲顶级球队效力嘅中场。不过大家睇过克罗地亚正选阵容，都知佢的年纪都唔细，包括两位正选中场在内，同埋前场攻击手文迪苏杰等，都年逾30岁，加上上仗除左门将苏巴锡大腿整亲捱到完场、右闸维沙积高亦因伤被换出，两人上阵成疑，可见球队经历连场激战，体能负荷极重，呢场明知体力输蚀，宁愿大打控球战术，拉住布同英格兰踢。
英格兰等足52年拒冒险
今届英格兰虽然星味欠奉，不过胜在球队平均年龄唔大，喺领队修夫基带领下稳打稳扎，表现成熟，成功继1990年之后，再次杀入世盃四强，引领英式青春风暴席卷俄罗斯。以稳守战术为先嘅英格兰，3人防线够稳阵，尤其门将比克福特过去两仗淘汰赛交出各种神救，演出令人眼前一亮。英格兰对上一次入到世盃决赛，已经系1966年，呢次再有机会创出佳绩，班波肯定唔敢轻举妄动，「三狮军团」放下以往强队身段，面对实力强劲，兼近4仗都同对手半场打和嘅克罗地亚，随时再缩后打反击，双方开局都求稳嘅情况下，半场和绝对捧得过。
