西班牙双星闯新天地
日职今午大战连场，当中西班牙双星恩尼斯达、费兰度托利斯早前分别转投神户胜利船同鸟栖砂岩，今午更有机会上演个人日职处子骚，大家点可以错过？
先讲5点开波嘅神户胜利船主场对湘南比马，踢完世界盃正式宣布退出国家队嘅「小白」恩尼斯达，上星期已经向胜利船报到，仲随队练左两日波，佢承认一下子要适应新环境系唔容易，但就觉得自己已经Ready，可以为胜利船主场出战湘南比马：「星期日对湘南比马我系有可能出场嘅，我讲唔上系有百分之百状态，但我觉得通过两日嘅训练准备，状态已经进一步提高，可以喺目前嘅最佳状态接受挑战。」神户主帅吉田孝行随后承认，今场肯定会出恩尼斯达，因为球迷都好想见到佢喎，何况德国射手普多斯基伤左，今次都要靠「小白」喇。
恩尼斯达学识日文「热」
声称已经学识一啲日文单词嘅恩尼斯达，学得最快嗰个字系「暑い（atsui）」，即系中文嘅热。事关日本近期受热浪侵袭，神户地区最高气温保持喺34度至35度，恩尼斯达咁讲：「关于温度，我认为真系好热。」「小白」仲话练波嗰阵队友同职员都会教佢日文，希望1个月后可以识讲更多。讲番场波，胜利船周中作客1比0击败长崎成功丸，连盃赛在内近4仗赢3仗，状态信得过，面对近期跌watt嘅湘南比马3分稳袋，主W值得支持。
鸟栖主帅 靠费托救亡
另一边厢嘅鸟栖砂岩就会喺主场对仙台维加泰，费兰度托利斯归左队1星期，砂岩监督费卡丹迪虽然唔肯确认今场会派佢上阵，但言语间就有暗示：「我肯定想起用托利斯呢种球员，佢经验丰富，对队波有刺激作用，佢一定会喺18人大名单入面。」老实讲，鸟栖目前排日职尾二，上半季伤兵多同攻击力弱系最大问题，依家费兰度托利斯嚟到，唔用唔通等输多两场至救亡羊？难得前日本国脚锋将丰田阳平又由韩职蔚山现代回巢，今场一定摆大个头希望赢波，尽早脱离护级漩涡，砂岩让平半，上盘同样博得过。
