边缘人争表现必搏命
听朝国冠盃压轴战，由首度亮相嘅「地上最强」巴塞隆拿，喺美国中立场出战热刺。巴塞队长美斯、苏亚雷斯等大部分世盃国脚都冇随队，不过备受争议嘅新兵马尔甘菲腊比就有赴美，热刺同样阵容不整，但洛兰迪、卢卡斯莫拉等一众冇份打世盃嘅边缘人坚落力，今仗实多波入，捧中位数2.5球嘅入球大更佳。
巴塞今次美国之旅，除左德国门将达史特根有随军外，未有召入美斯、苏亚雷斯、碧基、菲腊比古天奴等有份参加世盃嘅国脚，因此会由柏高艾卡沙、沙治罗拔图及新加盟嘅艾法亚美路等担大旗，配合一班B队成员，阵容都几残吓。
马尔甘菲腊比要显身价
讲到巴塞近日最爆嘅新闻，梗系将从已宣布加盟罗马嘅马尔甘菲腊比硬撬过档，呢位巴西翼锋加盟即赴美会合。讲真呢单交易备受争议，但若果马尔甘菲腊比有料到嘅话，就可冚晒啲批评声音，所以佢一定搏尽。
另一边厢，热刺同样有哈利卡尼、迪利阿里、维顿汉、洛里斯等多名世盃国脚未归队，个阵都系天残地缺，不过有基斯甸艾历臣赶及赴美，配合边缘人穆沙施素高、拉美拿、洛兰迪及卢卡斯莫拉。呢班边缘人都自己知自己事，一定趁今次国冠盃争取表现，在日前出战国冠盃便反胜罗马4比1，洛兰迪及卢卡斯莫拉更各省两粒，预计今仗都会继续抢攻，加上呢支北伦敦球队近4仗国冠盃，全开3球或以上，捧2.5球大盘更上算。
