笛子波童：阿根廷U20揭幕戰劏幼獅

  世青盃決賽周今日於南韓揭幕，A組首輪分組賽阿根廷U20硬撼英格蘭U20。阿根廷曾經6奪世青盃，係歷來奪標次數最多嘅球隊，相反英格蘭對上3次出席決賽周有2次分組賽出局，踢咗10仗僅入4球，法定時間之內從未贏過波，今場平手盤必捧阿根廷U20。   （LeSports HK 應用程式周六下午3時30分直播）   阿根廷曾經6奪世青盃，歷代唔少名將包括馬納當拿、列基美、沙維奧拿、美斯及阿古路等等都喺世青盃打出名堂，所以每次參賽都被視為捧盃大熱門。今屆阿根廷U20大部分主力皆來自國內球隊，當中以聖羅倫素前鋒干尼捷尼及競賽會射手拿達路馬天尼斯最被寄予厚望，另外CF格蘭納達前鋒艾斯基龐斯及效力意乙特拉帕尼嘅中場哥林巴圖亦係好波之人，以佢哋平均個人質素，喺A組出線應該唔成問題。   「三獅兵團」近年喺大賽表現欠佳，「幼獅」U20出戰世青盃情況都一樣，唔計上屆冇份打決賽周，英格蘭對上3次出戰決賽周，計埋一共踢咗10場波從未贏過，其中喺2013及2009年都係小組包尾出局，就算2011年能夠進身16強，英格蘭3仗分組賽其實都係踢成0:0，最終僅以小組第3名出線，嗰屆英軍陣中仲有哈利卡尼、艾歷迪亞、巴克里及史東斯呢班現役國腳，今屆英軍名單稍具名氣只有利物浦中場孖寶伊查利亞及舒爾奧祖，實力更不濟，而且英格蘭6月中還要出戰U21歐國盃決賽周，選兵難免有所取捨。   東道主南韓讓唔起畿內亞 另一場A組賽事由東道主南韓U20迎戰非洲代表畿內亞U20，南韓陣中雖有巴塞隆拿青年軍孖寶白勝浩及李承佑壓陣，但非洲球隊步大力雄，喺青年組賽事佔到唔少優勢，好似上屆世青盃就有馬里同塞內加爾兩支非洲兵殺入4強，實力不容忽視，畿內亞受讓捧得過。   （LeSports HK 應用程式周六晚上7時直播）