笛子波童：日本U20上盤抵撐

  15歲「美斯」踢到曉非 世青盃今日上演C、D兩組共4場分組賽，重頭戲首推D組南非U20鬥日本U20。日本今次大軍有唔少現役日職球員在陣，加上仲有綽號「日本美斯」嘅15歲神童久保建英充當秘密武器，有力擊敗質素平庸嘅南非響頭炮，日本小讓平半捧上盤。   （LeSports HK 應用程式周日下午4時直播）   D組除咗今場兩支主角日本及南非，仲有應屆U20南美冠軍烏拉圭及U19歐國盃亞軍意大利，以實力及經驗計，烏拉圭及意大利都喺日本、南非之上，所以對今場對賽雙方嚟講，如果想爭出線，今仗須全力求3分。日本今次點兵主要以去年贏得U19亞洲盃冠軍班底為主，包括喺亞洲盃攞到MVP、現效力大阪飛腳嘅中場發電機堂安律及其球會隊友初瀨亮，上述兩人喺今季日職都有唔少上陣機會，實力獲得肯定。   南非前鋒主力缺陣 前線則主要由磐田山葉嘅小川光樹夥拍京都不死鳥嘅岩崎悠人爭取入波，不得不提仲有曾經效力巴塞隆拿青年軍嘅久保建英，呢名15歲神童喺巴塞時期已受到廣泛關注，由於盤扭技術高超，被稱為「日本美斯」，佢喺上季重返祖國加盟FC東京U18，一直有踢J3賽事，今季曾代表一隊喺日聯盃對北海道札幌岡薩多後備上陣，今次能夠「越級」代表U20出戰，實力唔需要懷疑，話唔定會成為日本爭勝嘅秘密武器。   南非於年初舉行嘅U20非國盃賽事僅得第4名，實力本已唔突出，而且賽前仲有前線主力之一嘅馬林比因傷退隊，戰鬥力更打折扣。雖然佢哋陣中有3名球員喺葡萄牙搵食，不過主要都係參與青年軍賽事居多，斤両唔多夠秤，何況今屆賽事喺南韓舉行，日本唔使舟車勞頓等同有半個主場之利，南非失地利更難言惡，日本今仗小讓平半，上盤值博。   烏拉圭唔赦意大利 同組另一場賽事由意大利20鬥烏拉圭U20，剛才講過呢兩隊喺此組屬出線熱門，首戰交手必擦出火花。烏拉圭陣中有唔少好波之人，包括即將加盟祖雲達斯嘅進攻中場賓坦古亞、現效力皇馬B隊嘅華維迪及身穿10號波衫嘅迪亞高阿馬路等等，論質素唔會輸蝕得過意大利，平手盤捧烏拉圭。