Mic少：祖記搶盃大舉出擊

  三冠王次關強攻克羅托內 今晚意甲應該會誕生王者，由於截稿前，未知第2位羅馬及第3位拿玻里昨晚賽果，如果羅馬輸波同埋拿玻里失分，榜首祖雲達斯就可以提早捧盃。就算羅馬同拿玻里一齊贏波，祖雲達斯今晚只要主場擊敗克羅托內，都可以實現聯賽6連冠，以祖記超班實力，當然唔想夜長夢多，勢必主攻全取3分，喺自己地頭慶祝。克羅托內都要搶分護級，焗住豁出去一搏，中位數3/3.5球照捧入球大。   （TVB 302周日晚9時直播）   祖雲達斯原本上輪作客打和羅馬就可以捧盃，甚至有傳會方已經預定勝利巡遊巴士等活動，點知領先下倒輸收場，認真掃興。唔多唔少因為祖記要兼顧上周中意大利盃決賽對拉素，先至搞到輸畀羅馬。好彩祖記已經捧咗意盃，今仗可以專注「三冠王」第2關爭聯賽錦標，絕對唔會放過克羅托內，加上希古恩要爭神射手，餘下2場應會都會出真工夫，射爆對手。   克羅托內為護級駁火 克羅托內排尾三，仲喺降班區之內，今場冇得揀一定要以3分為目標。佢哋近期表現出色，近7場聯賽取得5勝2和，而且每場都有波入，證明護級決心非常強。克羅托內今場背城借一，亦唔理得對手有幾強，相信會勇往直前同祖記駁火，有利製造大比數賽果。