渡邊年：屈福特無情寧撐曼城

  曼城失分比利物浦同阿仙奴少，爭歐聯入場券相對形勢較好，今場作客屈福特前仲有好消息，「大黃蜂」賽前兩日突然宣布同領隊馬沙利解約，玩咗1季就要執包袱走人，話晒馬沙利都幫手護級成功，球會真係冇乜人情味，馬沙利用乜嘢心態帶呢場波，真係佢自己先知。曼城面對呢支冇嘢爭、冇鬥心、領隊冇心機嘅球隊，大勝一場冇難度，讓1.5／2球照捧上盤。   （Now 623及 LeSports HK應用程式周日晚10時直播）   曼城名帥哥迪奧拿今季登陸英超，首嘗執教生涯無冠滋味，因此更加要保住下屆歐聯入場券，才可向高層交代，只要今仗對屈福特和波便穩入前4，若果贏波更穩坐前3直入歐聯分組賽，毋須先打歐聯附加賽減低風險，加上老將薩巴列達早前宣布季尾離隊，若果今仗披甲的話，將會是他在「藍月亮」的告別戰，眾將必想用勝利歡送這名功勳右閘，鬥心不用懷疑。   屈福特現時處於踢風流波階段，上仗作客以3比4不敵冠軍車路士，防守之鬆散可見一斑，上仗更有中堅普特爾領紅牌被逐，今仗要坐波監，隨時令防線中門大開，況且雙方近5次碰頭，曼城全部獲勝，其中4次更贏2球或以上，加上領隊馬沙利冇癮帶波之下，排陣隨時亂點鴛鴦，相信曼城可大炒「大黃蜂」收咧。