英超豪門今夏一如以往，四處去唔同洲份踢表演賽掘金，咁到底邊隊會飛得最長、最多同最攰呢？原來有數畀你睇！
法明奴仲要返巴西結婚
據英媒統計，訪港嘅利物浦原來喺英超Big5（唔計熱刺）中，係飛行里數最長嘅球隊，總計要54,104公里，皆因包埋之前五月嗰陣飛澳洲悉尼在內，佢哋加埋喺國外要停五站（見附表），但就算點比，當然都同我哋前教育局長吳克儉儲埋嘅21萬公里飛行里數，都爭10幾萬公里。最辛苦可能係羅拔圖法明奴同幾位兄弟，因為佢喺星期二仲飛返巴西同拍拖四年女友Larissa Pereira結婚，佢幾位紅軍隊友菲臘比古天奴、盧卡斯、艾拔圖摩蘭奴同上季外借咗去哈化柏林嘅阿倫洛迪古斯都有份做兄弟，認真夠老友。
不過最長又未必最攰，紅軍踢完英超挑戰盃後，由香港飛去柏林踢奧迪盃，中間都隔咗成個禮拜，到時高路普一定輪流派唔同球員上陣，而佢到時又會多一位球員用，因為有埃及美斯之稱嘅穆罕默德沙拿，已落實會由羅馬過檔，周四抵達米活特訓練場進行體測，據聞轉會費高達3,400萬鎊，七月中必會隨隊來港。
紅魔最慘十幾日踢七場
排第二就係同樣飛亞洲嘅阿仙奴，飛34,113公里去悉尼、上海同北京三地，但7月22日就已經完成亞洲之旅，之後就返倫敦踢多兩場熱身賽等開季，同第三位嘅曼聯比，簡直係梳乎到暈。紅魔雖然只飛33,870公里，但就舟車勞頓過紅軍同兵工廠好多，因為佢哋美國之旅，11日內要飛去五個唔同城市，之後仲要飛去挪威奧斯陸踢場對華拉倫加嘅友賽，然後再飛到都柏林約戰森多利亞，合共有七場比賽，原來最慘係佢哋先真。
