死过翻生信心爆棚 阿根廷施法保下盘
世界盃16强淘汰赛今晚展开，头阵即嚟最激戏码，由法国火併阿根廷。法国虽坐拥10亿豪华锋线，但踢落冇章法可言；阿根廷上仗变阵成功出线，士气信心返晒嚟，波童相信呢隻「潘帕斯雄鹰」浴火重生可以走得更远，阿根廷受让平半必捧1.82倍下盘！
（Now 616及618周六晚10时直播）
今届16强戏码当中，只有呢场系由两支前冠军碰头，讲人脚法国基利安麦巴比、基沙文、保罗普巴个个身价亿亿声，加埋阿根廷嘅美斯、阿古路及保罗戴巴拿等，称得上系16强「最豪对决」。
美斯肯跑带动队友升呢
两军今届晋级过程差天共地，法国喺C组轻鬆获首名，最后一仗对丹麦仲有空间玩轮换；相反阿根廷一度陷出局边缘，好彩最后一仗喺非胜不可情况下，以2比1击败尼日利亚惊险出线。头两场分组赛被插爆冇领袖风范嘅美斯挺身而出，除左射入今届赛事个人首个入波，仲以身作则跑上跑落，带动全队精神面貌唔同晒，连马高斯卢祖都识用右脚入波，就知阿根廷球员信心返晒嚟。
正所谓「大难不死、必有后福」，波童相信经历多次逆境嘅阿根廷会愈变愈强，而且佢的上场之所以赢波，同阵容变动绝对有关，当中尤以中场班尼加担正最关键，有佢喺中场负责分波，美斯可以集中喺前线数胡，上场开纪录一球，正正系由班尼加传畀美斯射入。放弃「胶龙」韦尼卡巴尼路改用较稳健嘅法兰高艾马尼，亦大大减轻防线压力。
法国单靠质素各自为战
法国分组赛虽取得2胜1和，但头两场赢澳洲及秘鲁只系分内事，整体表现唔算出色，前线无论用基奥特或基沙文挂帅，效果都系麻麻，最大原因系保罗普巴、马度迪等中场发挥水准以下，令中前场球员经常出现各自为战、或单打独斗情况，分组赛尚且可凭个人质素赢波，但去到淘汰赛遇上士气、状态皆全面冒升嘅阿根廷，法国难言稳胜，阿根廷受让平半值捧。
