伊朗细味葡萄牙
奎罗斯倒戈复仇招呼C朗
B组最后一轮分组赛，亚洲代表伊朗将硬撼葡萄牙。葡萄牙正力争首名出线，虽然基斯坦奴朗拿度（C朗）脚风极顺，但今仗对手伊朗领队奎罗斯同佢劲深牙齿印，必然尽力「招呼」呢位葡萄牙王牌；伊朗上轮死守功力令西班牙攞唔到甜头，今场睇嚟都系「泊大巴」，葡萄牙即使赢到都唔慌会大炒，中位数2.5球嘅入球细1.62倍够滋味！
（Now 617及619台周二凌晨2时直播）
上轮仅负西班牙获好评
伊朗头两仗分组赛1胜1负有3分喺手，仍有出线机会，不过佢的首仗能以1比0击败摩洛哥，全靠对方后备入替嘅布夏迪斯补时摆乌龙，幸运成分极高，上仗面对实力高一班嘅西班牙，伊朗踢出超水准，可惜入波被判诈胡，最终仅负0比1。不过从呢两仗睇到，伊朗防守力及纪律极高，「斗牛国」对住葡军都入3粒，伊朗只输1球，可见佢的死守战术非常奏效。
伊朗现时以1分落后畀「双牙」，得失球亦输蚀，今仗要赢波先可获出线资格，加上伊朗近5次喺世盃决赛周斗欧洲球队输晒，全部都输2球或以上，望落好似唔够踢，但渡边年再次提醒大家，呢队伊朗同以前嗰队已经好唔同，「升呢」功臣自然系2011年开始执教伊朗嘅领队奎罗斯，佢彻底改造左伊朗踢法，由以往有前无后改成注重防守，喺亚洲区外围赛第3圈嘅「12强赛」，佢的足足有9场保持不失。
葡军未脱「一人球队」本色
当大家以为祖籍葡萄牙嘅奎罗斯会同国家队眉来眼去时，其实岩岩相反，奎罗斯2010年败走葡萄牙国家队系不欢而散，尤其喺嗰年南非世界盃，葡军0比1不敌西班牙出局后，C朗狂插话出局完全系奎罗斯责任，所以今场对奎帅嚟讲属最佳复仇之战，重点当然要箝制C朗，尽量减低佢嘅威力。葡萄牙今届所入嘅4球全部由C朗包办，如能够「封杀」C朗一挫佢锐气，必属奎罗斯赏心乐事，若然伊朗一个唔觉意令葡军失分攞唔到首名，甚至爆冷赢埋出线，奎罗斯屈左喺心8年呢啖怨气，乜都吐番晒出嚟。
葡萄牙向来对住死守球队无从入手，上仗对摩洛哥只能小胜1球，进攻板斧唔多，伊朗一心筑起铜牆铁壁嘅话，葡军未必咬得入，今场大细中位2.5球细盘塔落有味。
