尼馬未入局進攻冇靈魂
今晚世盃頭場E組第二輪激戰，巴西聯同哥斯達黎加上演「美洲大戰」。分組賽首輪畀瑞士逼和嘅巴西，皇牌尼馬仲未入局，搞到進攻失晒方寸；哥斯達黎加首戰僅負塞爾維亞，由門神基羅拿華斯領導嘅防線表現唔曳，有力頂住「森巴兵團」來襲，中位數2.5球嘅2.15倍細盤，好分頭值博。
（ViuTV 99、Now 616及618周五晚8時直播）
自領隊迪迪接手後，巴西大打前場壓迫戰術，正選陣容多咗好多「打仔格」嘅工兵型球員，前線3把尖刀尼馬、菲臘比古天奴及加比爾捷西斯就專注進攻，其中傷愈趕及踢世盃嘅尼馬，更加係巴西進攻嘅靈魂。表面睇巴西分工清晰，但換個角度，都可以話佢哋進攻過分依賴尼馬等人。
傷勢反覆表現患得患失
呢位世界最貴球員自今年2月重傷後，上月及時傷愈可帶領「森巴軍團」踢世盃，雖然趕得切，但大傷過後狀態點都差啲。上仗所見尼馬就急於表現過分盤扭，全場畀對手侵犯10次，係近20年嚟世盃單場被侵犯次數最多嘅球員。近日操練亦屢傳尼馬觸及舊患，傷勢問題令佢場上表現患得患失。再睇番巴西近4仗有3次開2球或以下，攻力並唔係想像中咁強。
哥斯達黎加勢泊大巴
哥斯達黎加上屆靠穩健防守打入8強，今屆佢哋繼續沿用呢個打法，上仗雖以0比1不敵塞爾維亞，不過以門神基羅拿華斯為首嘅後防表現唔差，尤其呢位皇馬首席龍門多次化險為夷，若然唔係畀高拉洛夫嘅罰球「屈機」，哥軍話唔埋可力保不失。今晚對住牌面更強嘅巴西，哥軍相信會再次「泊大巴」，以1分做目標。呢支中美洲球隊喺世盃近5仗，法定時間全開2球或以下，今場入球細屬信心之選。
