尼馬誓雪倫奧敗辱
今晚世盃16強重頭戲，奪標熱門「森巴兵團」巴西強戰「仙人掌國」墨西哥。巴西表現愈來愈弗，王牌尼馬入波助攻瓣瓣有，明顯已擺脫傷患逐漸上力，何況墨西哥仍受16強魔咒困擾，尼馬誓要率領「森巴兵團」，報番6年前倫敦奧運嘅一箭之仇兼殺入8強，讓球盤要讓一球都冇有怕，照捧巴西上盤。
（Now 616及618周一晚10時直播）
自從今年2月受傷後，啱啱好番嘅巴西王牌尼馬狀態令人擔心，尤其係佢畀人輕輕一撞即跌狂碌地，呢啲片段甚至畀網民惡搞添，但你咪理，呢位聖日耳門前鋒先喺對哥斯達黎加臨尾開齋，上仗對塞爾維亞又角球助攻堤亞高施華頂入，表現漸入佳境，連同好拍檔菲臘比古天奴已入2粒，配合韋利安、加比爾捷西斯等鋒將，火力極為可靠，中前場嘅控球能力，亦令防線的壓力大大減少。巴西喺今屆E組3仗分組賽以2勝1和獲首名出線，入5球僅失1球，攻守俱有水準，便是最佳例證。
墨西哥難逃16強出局魔咒
另一邊廂，墨西哥今屆同樣出色，喺F組分組賽取得2勝1負，包括擊敗上屆盟主德國，不過喺末輪慘吞瑞典3蛋，痛失首名資格之餘更幾乎出局，可見墨軍狀態比較飄忽，後衞赫達摩蘭奴今仗要坐波監，實力受削。「仙人掌國」近屆世盃往往能於分組賽突圍而出，但每次去到16強總係見晒底，之前6屆均於16強出局，近5屆中更有4次喺法定時間內輸波，包括上屆領先之下，末段連失2粒反輸畀荷蘭，緊張關頭經常甩轆，仍未擺脫16強魔咒。
雖然巴西喺2年前終於打破宿命，首嘗奧運足球金牌滋味，但其實佢哋早喺2012年就有機會封王，可惜由尼馬、堤亞高施華率領嘅「森巴奧運兵」，喺倫敦奧運決賽爆大冷以1比2不敵墨西哥，呢場敗仗對尼馬影響甚深，現時「仙人掌國」陣中仲有9名當年嘅奧運成員，其中赫達靴里拉、卡路士沙些度等係擔正添，巴西誓要一雪前恥。何況兩軍近6次交手，巴西取得4勝1和1負，4場勝仗中有3次贏2球或以上，無論狀態、經驗、往績及實力均遠勝墨西哥，讓球盤巴西要讓一球，上盤捧得過。
