質素狀態贏成條街
今晚世盃16強大戰，「歐洲紅魔」比利時鬥亞洲唯一代表日本。比利時今屆盡顯爭標實力，相反日本僅以公平競技得分力壓塞內加爾出線，帶有幸運成分，遇上養精蓄銳嘅「歐洲紅魔」隨時見底，比利時讓到一球、球半擺明有信心，捧2倍上盤！
（ViuTV 99、Now 616及618周二凌晨2時直播）
比利時今屆大部分主力俱曾出戰2014世盃及2016歐國盃，經過連續兩次8強出局，累積經驗捲土重來，表現更見成熟，盧卡古頭兩場分組賽已轟入4球，繼續刷新自己保持嘅國家隊最高入球紀錄，夏薩特及奇雲迪布尼等星級中場游刃有餘，未使出全力已夠殺，淘汰賽相信可見真功夫。比利時最後一場分組賽收起9名正選，仍以1球殺敗強敵英格蘭獲首名，雖則對手都係用後備，但由此所見比利時副選亦交到貨，令領隊馬天尼斯手執更多籌碼。
「膠龍」川島永嗣冇信心
日本係今屆唯一打入16強嘅亞洲代表，感情上本應值得鼓舞，但睇番佢哋分組賽表現，首場如果唔係哥倫比亞中場山齊士摩蘭奴開波3分鐘被逐兼輸12碼，日本未必可袋晒3分；次仗對塞內加爾喺兩度落後之下逼和2比2，都叫踢出鬥心，但門將川島永嗣連續兩場「派膠」，反映後防有唔少漏洞，最後一仗對波蘭最令人失望，球隊只要和波便可出線，結果竟以0比1輸畀踢風流波嘅波蘭，比賽末段更因怕輸得更多，放棄埋進攻，僅憑公平競技分力壓塞內加爾晉級，難怪賽後國民都唔多撐。今場對手比利時無論質素及狀態都贏成條街，日本難擋其鋒，上盤值捧場。
