铁血防守睇定嚟食 瑞典半和餐士高
世盃16强大战，今晚有瑞典同瑞士喺圣彼得堡一决高下。靠铁血防守见称嘅瑞典，防线不嬲有保证，加上瑞士有多位后防主力停赛，今仗更加唔敢冒进，早段宁愿睇定个势嚟踢，两军进攻唔算标青嘅球队相遇，半场和绝对有得谂。
（ViuTV 99、Now 616及618周二晚10时直播）
冇左「战神」伊巴谦莫域嘅瑞典，球员个人能力虽然唔算标青，不过呢支北欧球队，靠整体战术搭够，由外围赛到岩岩踢完嘅决赛周小组赛，表现一啲都唔比强队输蚀。喺领队赞尼安达臣带领下，虽然瑞典进攻板斧略嫌不足，但系防守表现绝对煞食，碍于控球能力一般，佢的唔会执着无谓嘅传球，让埋控球权畀对手都唔惊，皆因瑞典防守时有队长格兰基斯喺后场指挥防线，纪律性极强，唔会轻易畀对手太多埋门机会，计埋小组赛2次零封对手，瑞典近8仗就有7次半场同对手打和，进入淘汰赛更加唔敢乱攻，随时打稳守突击都唔奇。
瑞士双卫停赛前线唔敢乱攻
瑞士喺E组3战取1胜2和，仅随巴西其后以次名出线，表现可圈可点，尤其头两场面对晋级主要竞争对手巴西同塞尔维亚，瑞士都系喺落后劣势，先后追和同反胜抢足关键4分，可见班波韧力十足。
由于瑞士队长列治史迪拿同中坚法比安舒哈，上仗都攞左个人今届第2面黄牌，呢场要齐齐坐波监，瑞士冇左两位后防大将，呢场点都会踢得更小心，随时连梳顿沙基利等攻击好手，都要堕后助守，变相削弱佢的前场搵食能力。两军进攻实力都一般嘅情况下，睇怕开波早段都好难见到太多攻势，宁捧半场和好过。
