C朗冲700球大关
今晚欧国外B组同样爆发榜首大战，「1哥」乌克兰主场硬撼「2哥」葡萄牙。乌克兰依家lead住5分，今仗唔输即出线，难免打守势波，反而益晒急于抢分嘅葡萄牙，何况葡军王牌C朗近3仗为国披甲轰6粒，今仗再有入波即达到职业生涯700球大关，一定搏甩髀，客胜有计。
（有线604及603台周二凌晨2时45分直播）
乌克兰近年由名宿舒夫真高执教后，战绩稳步上扬，不过前锋出身嘅「军刀」带领嘅「黄蓝军」反以防守见称，今届6场欧国外取得5胜1和未输过之馀，更只失1粒，依家领先葡萄牙5分，今仗只要唔输，便锁定出线资格，为免有乜差池，一定会踢得稳打稳扎，但过于缩后亦非好事，变相令葡萄牙更容易控制战局。
葡萄牙现时领先第3位嘅塞尔维亚4分，想保住前2嘅出线席位，今仗不能鬆懈。好彩佢哋王牌C朗状态大勇，上仗赢卢森堡3比0又有进帐，近3仗为国效力狂轰6粒，亦令佢职业生涯累积699球，唔单止距离历史纪录嘅伊朗传奇球星戴伊嘅109个国家队入球又再近一啲，而且只差1粒便达到700球大关，佢咁要威梗係唔会揸流摊喇。翻查纪录，连上届在内，葡萄牙近6场欧国外作客赢晒，呢支衞冕之师为杀入决赛周必定搏尽，客胜捧得过。
