周六澳职嘅焦点，就梗係「墨尔本打吡」啦！主队墨尔本胜利嘅箭头托禾伦近日宣布伤愈，问题係久疏战阵状态难保证，加上佢哋对亲墨尔本城不嬲都斗得难分难解，估计今场双方都唔敢冒进，半场和好路。
（Now 638、有线614及654周六下午4时50分直播）
本田伤愈冇耐未够fit
胜利喺前锋托禾伦带领下走势强劲，可惜呢位前瑞典国脚近期伤出之后，表现即刻走样，包括早前喺榜首大战1比2不敌珀斯光辉。虽然托禾伦康复进度唔错，据报今仗仲可以候命，不过就未必返到最佳状态。同时，佢哋另一王牌本田圭佑，虽上仗射入12码，但其实都喺啱啱先好番晒，状态未到top fit，相信胜利呢场开局都会先以巩固防线为主。
墨城近况麻麻，近4场只得1和3负，呢场肯定希望喺同城打吡博反弹，早前由苏超回流嘅前锋占美麦卡伦，近2场为球队上阵都有波入，状态有番咁上下，可以保证打吡战唔会任人鱼肉。睇番往绩，近4次墨尔本打吡有3次开半场和，呢场两队为啖气肯定唔希望轻易输波，捧番半场和好过。
