卢森堡遇高卢鸡必然劣细

世盃外欧洲区A组赛事，榜首法国今晚会作客包尾嘅卢森堡，虽然牌面上两队强弱悬殊，不过法国自上年欧国盃决赛饮恨后正重建，领队迪甘斯仲未搵到最佳进攻战术，作客面对死守球队往往老鼠拉龟，而且卢森堡近年进步神速，已经好少畀人大炒，今仗中位数3.5球嘅入球细不妨一试。 （有线62及202周日凌晨3时45分直播） 法国队人才辈出，今次点兵「高卢鸡」中前就有「3G」基奥特、基沙文同加美路助阵，首度入选嘅「新亨利」基利安洛天，更加係近期欧洲炙手可热嘅超新星，不过呢班前锋最擅长玩速度同灵活，面对密集防守较难发挥，唯一柱趸中锋基奥特状态麻麻，加上保罗普巴因伤落选，迪甘斯又未搵到一套有效嘅进攻程式，都几湿滞。 睇番法国队喺世盃外成绩，连同上届世盃外在内，「高卢鸡」近7仗世盃外作客只入得7球，当中有6仗总入球係2球或以下，效率极低，而且所遇嘅对手有白俄罗斯、格鲁吉亚、芬兰等玩「龟缩」嘅弱旅，卢森堡今仗极有可能照办煮碗，中位数3.5球嘅「细」盘绝对值得支持。 踢完4轮仅负4球 主场嘅卢森堡畀人印象係超级鱼腩，以往面对世界级劲旅输十球八球都係等閒事，不过佢哋近年其实进步好大，对住荷兰同瑞典都只係输2球同1球，目前踢咗4轮赛事得失球差只係负4球，可见卢森堡已非吴下阿蒙，绝对有力令守强攻弱嘅法国遇上麻烦，「入球细」放心捧场。