残阵拜仁咬唔入多蒙特

德盃冤家近3对赛难分高下 今晚德国盃4强爆发重量级国家打吡，衞冕嘅拜仁慕尼黑主场火併「蜜蜂兵团」多蒙特。两队都喺欧联出局，而拜仁喺联赛又放到甩辘，多蒙特今季夺标希望剩馀德盃，必定搏甩髀，加上近3次德盃交锋法定时间都未分高下，今场受让一球必捧「蜜蜂兵团」下盘。 （无綫翡翠台及TVB 13周四凌晨2时45分直播） 拜仁与多蒙特皆于欧联8强被淘汰，现时只能专心国内赛事，但睇番联赛拜仁已领先「2哥」RB莱比锡8分，捧盃只係时间问题，因此多蒙特若果想今季有盃落袋，如今只剩番德国盃，因此战意唔使怀疑。多蒙特日前联赛反胜慕逊加柏3比2，一吐欧联出局嘅乌气，尤其係伤愈复出冇耐嘅马高列奥斯，连续3仗有波入，弗到漏油，呢位型仔扬言队友纽尼沙轩受伤唔出得都冇有怕，仲话「蜜蜂兵团」成队信心返晒嚟，誓要击败强敌拜仁杀入决赛。 蜜蜂兵团受让抵捧 另一边厢，拜仁梗係想力争做国内双冠王喇，不过从日前联赛逼和缅恩斯2比2嚟睇，似乎佢哋仍未走出欧联出局嘅阴霾，加上阵中有左闸阿拉巴伤出，今仗肯定唔使预佢，而门神纽亚亦提早收咧，两大中坚晓姆斯及谢路美保定一直以来带伤上阵，而中场悍将维达尔嘅妹夫日前于智利遭枪杀身亡，虽然佢坚持备战德盃，冇陪家人返智利处理妹夫身后事，但心情难免受到影响，既然咁多隐忧，拜仁主帅安察洛堤定必先求稳阵。 连今届比赛在内，呢对死敌已经连续4届于德盃碰头，之前3次喺德盃交手，法定时间内全部打和，证明佢哋喺1场过嘅淘汰赛对垒都会小心翼翼，预计今仗喺法定时间未必能分出高下，让球盘多蒙特仲有得受让一球咁笋，下盘不容错过。