迪布尼复出重灌火力
今晚英超尾场，「2哥」曼城作客水晶宫。英超开咧仅8轮，衞冕嘅曼城已经畀榜首利物浦甩开8分，嚟紧每一场可以话不容再失，「助攻王」奇云迪布尼及时复出，「蓝月亮」势必火力全开，不过近年碰头水晶宫每每有「神经刀」演出，宁捧3.5球嘅大盘更上算。
（Now 621及611周日凌晨零时30分直播）
曼城头8场联赛3度失分，包括爆冷输畀诺域治及狼队，依家畀8连胜嘅「1哥」利物浦抛离8分。不过睇番「蓝月亮」上季亦曾一度落后7分，最终都可后上封王，毕竟现时仲係季初，只要往后保持连胜，反先绝不是梦，嚟紧赛事只会更有决心。曼城一向进攻大过天，王牌阿古路暂以8球位居射手榜榜首，史达宁喺早前国际赛亦频有进帐，最紧要係奇云迪布尼亦伤愈候命，呢位比利时中场今季联赛已交出8次助攻，排紧助攻榜「1哥」位，有佢支援阿古路及史达宁实大把机会，单睇佢哋今季4场联赛作客狂轰13粒，全开4球或以上，就知火力有几劲喇。
近年对赛形势均等
现排第6嘅水晶宫论牌面可能唔及曼城，但今季演出可人，曾经赢过曼联及韦斯咸，绝对唔失礼，而且主帅鹤臣擅打突击，坐拥「魔翼」韦费特沙夏、安祖斯唐辛及正前锋佐敦阿休，狂打反击常令强队措手不及。
翻查两军近3次联赛碰头，各得1胜1和1负，包括上季水晶宫作客反胜3比2，而前季主场闷和0比0之役，如果唔係米利禾积域末段射失12码，战果已经改写，可见水晶宫对住曼城，唔会「肉随砧板上」，不妨捧3.5球嘅入球大。
