惨中「FIFA病毒」残晒
今晚西甲压轴尾场，「1哥」皇家马德里作客升班球队马略卡。皇马惨中「FIFA病毒」，莫迪历、加里夫巴利先后中招，伤兵唔少，而且每逢客场出击，经常老鼠拉龟冇碇埋手，马略卡亦甚少畀今仗倒戈嘅日本新星久保建英担正，初段唔敢冒进，不妨转玩半场和。
（Now 632及611周日凌晨3时直播）
国际赛期对一众欧洲豪门嚟讲，都係有苦自知，皇马亦唔例外，啱啱打完两周「太公波」，就有中场莫迪历、前锋加里夫巴利带伤而回，今仗肯定缺阵，乌拉圭小将费达历高华维迪啱啱先归队，应该畀佢抖抖，连同本身有华拉尼、卢卡斯华斯基斯、马高阿辛斯奥、拿祖费南迪斯等未好番，主帅施丹真係牙痛咁声。虽然皇马排紧榜首，但老实讲表现麻麻，好似上仗联赛领先CF格兰纳达3球之下，一度被对手追番两粒，最终赢4比2，睇落冇乜霸气。
马略卡冷落久保建英
今季重返西甲嘅马略卡，只能徘徊下游，主因係攻力唔掂，打咗8轮联赛入得6粒，其中5仗食白果，而最瞩目新星兼皇马借将久保建英，今仗被视为「银河舰队」对呢位日本神童嘅睇办战，对佢嚟讲都好重要，可以证明自己拣外借去马略卡係冇错，不过久保今季只曾2次正选披甲，今仗未必会担正倒戈，面对强队一定玩死守。况且皇马今季4仗作客联赛，3次开半场和，可见佢哋作客初段唔多入局，半场和值得再追。
