巴塞客爆西维尔
2020/06/19文:邪神
巴塞隆拿前锋美斯
1/2
美斯抢入第700球
西甲3哥西维尔今晚主场迎战榜首巴塞隆拿，虽然西维尔复赛后录得1胜1和，连同停摆前联赛6仗不败，但佢哋近年对赛输多赢少，「地上最强」争标心切，加上球王美斯为取得职业生涯第700球肯定搏尽，今场简单啲捧巴塞客胜。
（Now 632周六凌晨4时直播）
经过漫长停摆期后，西甲上周复赛就係由西维尔打头阵，主场迎战贝迪斯合演塞维利亚打吡，结果西维尔顺利赢2比0打响头炮，不过第2仗作客联赛榜中游嘅利云特，佢哋未能乘勇取得连捷，只能与对方踢成1比1平手，可见频密赛程对兵源紧绌嘅西维尔颇为不利。
近7次交手6胜
西维尔依家排第3，喺欧联席位之争仍有一定优势，但绝对不容大意，因为随后嘅马德里体育会仅落后2分，皇苏同基达菲亦步亦趋，对佢哋造成一定压力。不过西维尔整体实力始终同巴塞有一定距离，加上近7次交手又仅得1胜6负，明显畀「地上最强」食住，就算想抢分都有心无力。
巴塞喺西甲重开首仗作客大胜马略卡4比0，次仗返主场对雷加利斯亦赢2粒，球王美斯2仗都有进帐，佢喺场边向队友训话嘅画面令人印象深刻，亦可见球队喺美斯「指导」下万众一心。美斯上场斗雷加利斯射入职业生涯第699球，今场省多粒就达到700球里程碑，相信佢一定会落多两钱肉紧，巴塞有望赢波再开W。
