伤疲尽起！热刺扑锤攞3分
2020/06/23文:渡边年
哈利卡尼
英超复赛首个快车期爆伦敦打吡，热刺主场斗韦斯咸。热刺停摆期后伤疲尽起，王牌哈利卡尼、中场孙兴民及门将洛里斯复出，迪利阿里停赛后可以上阵，兵源充足，有力轻取作客不济嘅韦斯咸，捧主胜。
（Now 621周三凌晨3时15分直播）
原本长期养伤嘅哈利卡尼及洛里斯，重开后首仗对曼联已经上阵，迪利阿里因发表不当言论被罚停赛亦已经刑满，今场对住「锤仔帮」，领队摩连奴可以派强阵出击。经过一场对曼联1比1嘅激战之后，热刺众将操起状态，尤其哈利卡尼经过热身后，相信今场会有更佳表现，贝云积上场更加打开纪录，加上佢哋连续两场主场出击，唔使舟车劳顿，喺快车赛期相当有利。
旧年11月接手热刺嘅摩连奴，英联盃、英足盃同欧联都已经出局，今季剩低嘅目标係争欧洲赛资格，如果咁都做唔到，一代名帅颜面何存，今场佢肯定精锐尽出，免得被人口诛笔伐。
韦斯咸作客脚软
身处护级漩涡嘅韦斯咸极需要抢分，但佢哋上轮主场都不敌狼队0比2，好彩喺佢下面3队般尼茅夫、阿士东维拉同诺域治齐齐输波。不过，作客一向係「锤仔帮」死穴，韦斯咸近6场联赛作客全败，之前作客先后不敌曼城、利物浦及阿仙奴，今仗又要对另一支前列球队热刺，要抢分真係难过登天，热刺个Ｗ相信会愈买愈热，有买趁手。
