华迪争入100球李城抢Ｗ送礼
2020/06/23文:臻赢特
占美华迪
今晚英超早场有李斯特城斗白礼顿，李城复赛首战临尾畀屈福特逼和极唔抵，今仗返主场作战，「华Dee」占美华迪要争取个人英超第100球，肯定搏老命；白礼顿上场反胜阿仙奴，只因「兵工厂」表现差，「狐狸」近5次交手赢4次，必捧主胜。
（Now 621周三凌晨1时直播）
李斯特城同白礼顿复赛后首场赛事，同样喺补时有球队入波，不过李城係受害者，被屈福特追和1比1，相反白礼顿就係得益者，入波反胜阿仙奴2比1。两军首战后联赛位置冇变，李城坚守第3位，白礼顿仍然排15，但下面5队全失分，变相护级压力稍为减轻。
白礼顿输往绩
于联赛射手榜领先嘅占美华迪，有望取得个人英超第100球，领队罗渣士相信会为佢提供机会，上场后备上阵嘅伊恩拿祖及迪马雷格雷将会复任正选，此外，西班牙前锋艾约斯佩雷斯亦可以候命，中前场有足够调配。
白礼顿上仗有澳洲中场阿伦穆尔伤出，今场肯定缺阵，佢哋对住李斯特城一向捱打，近5次交手只得1和4负，真係未踢已经投降，加上「华Dee」专门喺佢哋身上搵食，最近4次对「海鸥」，占美华迪都有波入，今场主胜真係送畀你。
