皇马半场胜菲买不可
2020/07/02文:法达斯维
（Getty Images图片）
赢埋今仗带开4分
今晚西甲尾场上演马德里市打吡，皇家马德里喺B队嘅迪史堤芬奴球场迎战基达菲。「银河舰队」弗到漏油，而且基达菲係佢哋嘅「私房菜」，几乎次次都由头赢到落尾，喺赛程频密下，随时又玩速战速决，半场主胜值得捧场。(Now 632周五凌晨4时直播)
皇马自复赛后即刻入局，联赛豪取5连胜，趁住巴塞连番失分，依家打少1场下领先巴塞1分，位居榜首，由于巴塞啱啱又打和马体会，若果皇马今仗赢波，就可甩开4分，全面掌握争标主导权。同时，皇马后衞费兰特文迪及中场莫迪历停赛完毕，今场可以候命，主帅施丹虽然擅用轮换制，但个别主力如却奥斯甚少获得休息，「魔笛」及时复出，可轮换呢位德国国脚之馀，中场组织力亦唔会削弱，可为箭头宾施马（图）输送弹药。
基达菲近况往绩输晒
另一边厢，季初状态不俗嘅基达菲，复赛后战绩大插水，近5场联赛只得1胜3和1负，其中3场更喺领先下被对手逼和或反胜，防守坚唔稳阵。翻查纪录，基达菲近年畀皇马食住，近7次联赛交手，「银河舰队」唔单止取得6胜1和未输过，呢6场胜仗更全部喺上半场已取得领先优势，最终由头赢到落尾，非常抢缰，喺复赛后咁频密赛程下，「银河舰队」为免耗力太大，必想早早入波锁定胜局，半场主胜有计。
