曼联强势上盘要得过
2020/07/09文:法达斯维
维拉球星 基亚利殊
1/2
双核挞着狙击维拉
今晚英超压轴尾场，弗到漏油嘅曼联作客阿士东维拉。维拉踢咗大半季都喺护级漩涡挣扎，但复赛后依然未见起色，相反曼联喺「双核」保罗普巴同波基斯费南迪斯带动下，连场报捷个势劲旺，为争下届欧联入场券唔会留手，虽然今场让到1/1.5球咁辣，上盘仍然捧得过。
（Now 621及611周五凌晨3时15分直播）
凭升班附加赛于今季重返英超嘅维拉，梗係唔想做「升降机」喇，但偏偏复赛后要面对「魔鬼赛程」，结果先后输畀实力分子车路士、狼队及利物浦，今场又迎战另一支要抢分争前4嘅曼联，实在凶多吉少。事实上，维拉领队甸史密夫亦识得避重就轻，于频密赛事之下，将主力留番喺可以抢分嘅场合搏杀，无谓同劲敌硬撼，不过以往维拉即使全力出击，近5次地头迎战曼联只得1和4负，就算王牌球星基亚利殊施展浑身解数，但近几仗所见亦独力难支，今场想抢分护级绝对唔易。
红魔近16仗未输过
另一边厢，曼联为咗攞到下届欧联参赛席位，抢分决心毋庸置疑，保罗普巴复出可谓及时雨；呢位法国中场与波基斯费南迪斯组成「双核」，更全面释放「波费」嘅进攻潜能，上仗反胜般尼茅夫5比2，佢又入靓罚球兼交出两次助攻，成功激活前线安东尼马迪尔、拉舒福特及格连活特等「生牯仔」，火力全开，近3仗联赛均至少赢3粒，继续向前4位置进发。连同盃赛在内，「红魔」自2月起未输过，近16战法定时间录得11胜5和，个势咁旺，难怪让球盘让到1/1.5球咁辣，正所谓宁买当头起，曼联作客都未惊过，照撑上盘。
