车仔抢攻半大有计
2020/07/14
基斯甸普列锡
车仔前锋
1/3
．诺域治降班任人砌．
今晚英超独脚戏，车路士喺主场迎战「金丝雀」诺域治。车仔啱啱大败失分，为保前4必搏尽抢分，遇上已笃定降班兼防线穿晒窿嘅包尾诺域治，随时一开波即抢攻对手，中位数1.5球嘅半场大趁早买。
（Now 621周三凌晨3时15分直播）
车仔复赛后6场联赛取得4胜2负，包括勇挫曼城「协助」利物浦提早封王，主帅林柏特应记一功。由于年轻箭头「谭仔」谭美阿巴谦状态唔及季初，「林伯」果断用番本来已放入「雪柜」嘅基奥特，仲将原本约满嘅韦利安留到季尾，两位老将亦交足货，基奥特复赛后6场联赛入3粒，韦利安亦有4球进帐及交出2次助攻，果然薑愈老愈辣。不过，林柏特上场忽然搵番「谭仔」担正，最终作客惨吞锡菲联3蛋坚肉酸，前4位置仍未稳阵，今场需要抢分，预计基奥特今仗打番正选肯定力争士哥，车仔攻击力有保证。
近4场联赛半场开晒大
包尾嘅诺域治虽然场场都好落力，可惜实力有限，自从复赛后连输6场，包括上场以0比4大败畀韦斯咸，宣布提前降班，亦係英超史上首支5次降班嘅球队，成班波冇晒信心，加上佢哋今季联赛狂失67粒，防线穿晒窿，若果单计联赛作客，「金丝雀」近8场更录得1和7负，球员无心恋战下，上半场好大机会已经先失守。
「蓝战士」上场惨败，今场实搵「金丝雀」出气，佢哋近9场联赛入20球火力十足，有本钱一开波就抢攻，既然车仔近4场联赛半场全开2球或以上，1.5球嘅半场大分头唔错，有买趁早。
