比利时英格兰玩斗9
季军Show金靴大战
今晚世盃季军战，两支4强输波球队比利时同英格兰，将会继小组赛之后再次碰头。呢场除左系第3名之争，仲系两位9号仔前锋哈利卡尼同卢卡古争夺今届神射手嘅关键一战，两人无缘争冠心都碎晒，为赢得呢项殊荣，进攻意欲肯定强，加上过去世盃季军战不嬲多波入，呢场捧中位数2.5球入球大冇走鸡。
（Now 616及618周六晚10时直播）
大打进攻足球嘅「欧洲红魔」比利时，绝对系今届32强分子之中，踢法最具娱乐性嘅一队。佢的喺16强面对日本落后两球，最终上演热血反击，连追3球反胜3比2，跟住再喺8强以2比1击败传统劲旅巴西，可惜4强受制于法国铜牆铁壁，最终输0比1要转战季军战。
卢卡古射手榜丧追哈神
比利时今届决赛周至今6场轰入14球，火力强劲，奇云迪布尼、夏萨特及卢卡古等一班进攻天才，个个都有进帐，尤其箭头人物卢卡古，无论拉边或者喺中路强行突破，威力都十分惊人，至今个人已经斩获4球，只落后带头嘅「哈神」哈利卡尼2粒，呢场绝对仲有得追，为攞神射手肯定搏命。
另一边厢，以年轻球员为骨干嘅「三狮兵团」英格兰，上仗4强领先克罗地亚后，一班小将明显怯场，未能扩大优势之馀，仲畀对手反胜，最终同决赛擦身而过实在可惜。不过英格兰前场进攻好手，包括史达宁同连格，质素绝对唔差，上仗多次畀到对方后防威胁，去到季军战无左心理包袱，相信可以交出最佳表现，全力支援至今已经射入6球嘅哈利卡尼，巩固佢嘅神射手优势。
值得留意，「三狮兵团」中场佐敦轩达臣、后卫捷比亚同基尔获加都有伤，冇左呢几位中后场主力，英格兰防守有隐忧，失波唔奇。况且历来世盃季军战经常上演入球骚，自1978年，近10届季军战全开3球或以上，呢场有两大射手力争世盃神射手，入波肯定唔会少，中位数2.5球入球大系心水之选。
