曼联打堡寸王为徒弟讨公道

今晚英超头场，「6叔」曼联作客下游分子米杜士堡，原本係两军主帅莫连奴及卡兰卡嘅师徒对决，可惜卡兰卡上周中突然畀米堡炒鱿，加上连续10场联赛未赢过，难挡一心为徒弟讨回公道嘅「寸王魔兵」来袭，曼联让半一照捧上盘。 （Now 621及LeSports HK应用程式周日晚8时直播） 曼联主帅莫连奴喺2010至13年执教皇马期间，前皇马中坚卡兰卡曾担任佢助手，2人劲friend，之后两人转战英伦，卡兰卡转教仍喺英冠嘅米堡，亦获得当时回巢教车路士嘅「寸王」相助，不断借兵畀佢，成为今季重返英超嘅关键，而首循环双方交手，米堡领先1球之下，竟喺完场前连失2粒呕晒3分出嚟，唔知係咪卡兰卡「回礼」畀师傅呢？ 当大家期待呢两师徒再度对决之际，卡兰卡喺上周中突然收到米堡大信封，似乎又好似李斯特城嘅云尼亚里畀班球员跣镬甘，因为米堡自上年12月中击败史云斯之后，10场联赛只获4和6负未赢过，未踢今轮之前，打咗27仗联赛入得19球咁大把，係英超入波最少嘅球队，难怪跌到落尾2喇。米堡依家暂时由助教阿格纽接手，但佢哋太倚赖箭头尼格度数胡，其他队友嘅入波及创造力都唔掂，以为炒咗卡兰卡就解决晒所有问题？实在太天真喇。 闹米堡炒卡兰卡冇良心 莫连奴都睇唔过眼，赛前先闹米堡高层冇良心，唔念卡兰卡帮佢哋升班，仲话知道米堡边几个球员係「二五仔」夹计整走卡帅，今仗誓要教训佢哋帮爱徒出番啖气。虽然曼联今仗有王牌伊巴谦莫域及安达靴里拉要坐波监，但佢哋近17仗联赛未输过，随住上周中喺英足盃8强畀车仔踢出局，依家嘅目标就剩番欧霸盃及联赛前4，未踢今轮之前，红魔落后「4哥」利物浦6分，不过打少2场，绝对有机会从后赶上，加上今季作客下游分子李斯特城、水晶宫、史云斯、侯城及般尼茅夫全胜，今仗唔会放过米堡，就算让半一照撑曼联上盘。