王牌C朗恰惯马体会
周三凌晨欧联16强次回合焦点大战，祖云达斯返到主场再斗马德里体育会。意甲1哥祖记首回合淨吞两蛋，呢场肯定全力反攻，其中「老妇人」王牌基斯坦奴朗拿度（C朗）不嬲都係马体会剋星，呢场有佢压阵，祖记主场出击有力取胜，肯定拣主胜。
（Now 644、有线602及662台周三凌晨4时直播）
连续7届称霸意甲嘅祖记，以往攞联赛攞到手软，今季只有捧起欧联冠军，先至可以满足到「老妇人」嘅野心。呢支意甲班霸近几届欧联多次打入淘汰赛最终阶段，可惜都饮恨而回，今届佢哋于16强再次遇到难关，首回合爆冷以0比2输波，呢场球队肯定做好背水一战嘅准备。祖记今季高调引入C朗，无非就係想靠呢位上届欧联神射手嘅超班入波能力取胜，上仗联赛佢同基亚连尼、文迪苏杰等主力齐齐免战抖到足，就係为咗养精蓄锐搏呢场，况且这位葡萄牙国脚专剋马体会，过往效力皇家马德里时曾经22度轰破对手大门，包括7次于欧联淘汰赛碰头攻入4球，呢场随时再有好戏上演。
马体会两主将坐波监
而且马体会喺铁帅施蒙尼带领下，一向擅于防守，呢场拎住两球喺手，仲有中场汤马士柏迪同箭头迪亚高哥斯达齐齐坐波监，作客嘅马体会肯定死守，变相将进攻主动权让咗畀祖记。查实面对主场强势嘅「老妇人」，今季作客来访摆铁桶阵嘅球队又点只马体会，不过就算係咁，祖记依然有唔少板斧攻破重重防线，相信经验更胜一筹嘅祖记有力係主场赢番一仗。
