德英老友聚头大骚欢送王子

今晚免费台直播重量级国际热身赛，德国于多蒙特主场西法伦球场迎战老对手英格兰，德国足总安排今仗作为「王子」普多斯基嘅国家队告别战。两军嚟紧周日晚都有世盃外围赛任务，预期试阵居多，加上「欢送波」因素，竞争性骤降而表演味浓，相信会以一场入球骚送别王子，首选中位数2.5球嘅大盘。 （无綫翡翠台、TVB 13台周四凌晨3时45分直播） 普多斯基曾効力德甲科隆同拜仁慕尼黑多年，亦喺英超阿仙奴度过3个球季，德英两国大把老友记，今场都会畀面撑场，当中包括喺德军同佢散发过「Gay味」嘅好拍档舒韦恩史迪加，仲有阿仙奴同国家队双料队友梅迪萨卡，虽然两人已退出国家队唔会落场，不过都会出席佢嘅告别礼，预期双方落场球员会畀足面主角，等佢尽情发挥。 留力世盃外 狂换试新丁 德英两军今次召入咗唔少新丁，德国首次选入RB莱比锡射手迪姆华拿，作为「王子」接班人；而英军领队修夫基一口气召入3名新兵，包括般尼后衞米克坚尼、修咸顿中场列特文同禾特普斯，呢批小将暂时唔会喺世盃外担任主力，正好借今仗试兵，两军对胜负嘅重视程度相对会放得较轻，相信会喺比赛中大量换人留力世盃外。 双方今仗都有伤兵问题，德军纽亚、谢路美保定、马高列奥斯同马里奥葛斯缺阵；英军亦冇咗哈利卡尼、朗尼、佐敦轩达臣同禾确特。不过双方大把人才，德国有普多斯基嘅前阿仙奴队友奥斯尔回归，英军亦有老将迪科尔久别重临。睇番上次对赛，德国一年前喺柏林主场热身赛以2比3不敌英军，今场冇压力踢「欢送波」，入波又点会少！