英军主场11连胜恶过鬼 幼狮搏表现立威

今晚续有世盃外欧洲区赛事，当中F组榜首英格兰主场迎战弱旅立陶宛。「三狮兵团」经常喺大赛决赛周「冇货交」，但喺压力冇咁大嘅外围赛表现特醒，主帅修夫基又刻意用新仔，趁住朗尼及哈利卡尼等惯常主力受伤，拉舒福特、连格及米克坚尼等「幼狮」一定搏晒命，英格兰嘅1.95倍让球主胜咪错过。（有线61及201台周一凌晨零时直播） 英格兰每逢大赛决赛周都有姿势、冇实际，已经51年嚟未赢过重要锦标，球员每次比赛不其然孭住个大包袱，又点会打得好！相比之下，英军喺压力冇咁大嘅外围赛零舍突出，特别係主场出击，连世盃外及欧国外在内，「三狮兵团」近11仗主场出战嘅大赛外围赛全胜，非常靠得住，尤其对住弱旅一啲都冇手软，之前迎战圣马力诺、摩尔多瓦及今仗对手立陶宛都大炒，明显锺意「嗒鱼腩」。 现任英军主帅修夫基之前係执教英格兰U21，因此对班新仔非常了解，适逢今次队长朗尼及射手哈利卡尼、史杜列治等因伤冇入选，同时两大曼联守将菲尔锺斯及基斯史摩宁亦受伤退队，另一中坚加利卡希尔又要坐波监，对手只係弱队立陶宛，「修哥」大条道理搵新人孭飞。除咗红魔小鬼拉舒福特及连格有机担正外，修咸顿孖宝禾特普斯及列特文、般尼守将米克坚尼等「平民」均有机会落场，正所谓初生之犊不畏虎，呢班「生牯仔」趁住班大佬唔喺度，梗係要骚哥利畀「修哥」睇下。 立陶宛残阵听炒 本身实力唔掂嘅立陶宛，今仗有主力艾云捷华尼斯及安祖斯基斯因伤倦勤，守将费治马斯亦要坐波监，真係弱上加弱。而且英格兰除咗上面班「生牯仔」外，仲有赫特、拉尔拉拿及迪利阿里等主将压场，要大炒毫无难度，就算让两球都照捧1.95倍嘅让球主胜！