曼联残阵捱细界

曼联今晚10点喺奥脱福主场对西布朗，本应属赢波力追前4大好机会，可惜「红魔」今场阵容超残，箭头伊巴谦莫域续停赛，对锋力造成影响，主Ｗ得1.28倍唔值博，捧中位数2.5球嘅1.93倍入球细较上算。 （Now 623及LeSports HK应用程式周六晚10时直播） 伊巴停赛 影响锋力 曼联目前喺联赛排第5位，落后第4位嘅利物浦4分但踢少两场，争入前4唔係奢望。虽然曼联仲可凭欧霸盃做「跳板」参加来届欧联，不过依家只係8强阶段，联赛冇理由咁快放软手脚。可惜佢哋今场存有隐忧，前锋伊巴谦莫域及中场安达靴里拉继续停赛，朗尼、保罗普巴、费兰尼、菲尔锺斯及基斯史摩宁都有伤在身，阵容残到爆，当中伊巴嘅缺阵影响最大，皆因佢就佔咗球队3成入球，「红魔」想谷都未必谷得起。 西布朗目前有43分排第8，已达传统上40分嘅护级安全线，但想攞欧洲赛资格又有段距离，决心未必及主队，不过西布朗近7次对红魔取得3胜1和3负，当中3次作客奥脱福赢过两次，往绩唔曳，睇番近4次交手两队夹埋入得6粒，以中位数2.5球计更係全部开细，预计今仗唔慌多波入。