阿仙奴韦斯咸保帅大斗法

英超今晚仲有场「伦敦打吡」，志切踢争气波嘅阿仙奴主场迎战「锤仔帮」韦斯咸，两队近期形势称得上水深火热，主帅云格同比历都有下台危机，今仗肯定希望踩住对手反弹，睇番两队近年交锋例牌多波入，今仗驳火机会高，中位数2.5嘅入球大係不二之选。 （Now 622及LeSports HK应用程式周四凌晨2时45分直播） 阿仙奴近6场联赛只係拎得4分跌到落第6位，要入前4嘅话真係唔可以再颓落去，球队上仗同曼城激战踢成2比2，睇到球员有番啲火想踢争气波，奥斯尔复出表现活跃，加上阿历斯山齐士为首嘅多支大炮，火力唔讲得笑。可惜阿仙奴防线漏洞极多，后防核心哥斯尼上仗仲要伤埋，想保持不失有一定难度。 近年碰头多演入球骚 韦斯咸自皮耶喺冬季转会窗离队后，有兰仙尼、阿休、辛迪加斯等分担进攻，火力并冇减弱，只係后防同样唔掂先至搞到连输4场，现时只係多尾3嘅侯城6分，护级未稳阵，今仗作客冇得死守。两军近年碰头均火花四溅，单计近10次联赛交手，双方共炮製41个士哥，当中有9仗总入球达3球或以上，再演入球骚唔奇。