车仔踩油以快打曼

主场遇强有靓绩保证 今晚续有英超快车，更爆发「双蓝会」，由「1哥」车路士主场恶斗「蓝月亮」曼城。车仔上仗意外输波，为保争标优势不容再失，而且佢哋主场面对前列球队非常Sharp醒，王牌夏萨特更明言留队大派定心丸，面对遇强例脚软嘅「蓝月亮」，有力赢波重上正轨，2.25倍主胜有计。 （Now 621及LeSports HK应用程式周四凌晨3时直播） 车路士上仗意外反输畀水晶宫1比2，联赛主场10连胜断缆，依家比「2哥」热刺多7分，虽然优势明显，但若果再好似上仗咁轻敌输波，唔单止打击球员信心，随时畀表现坚稳定嘅热刺愈追愈近，到时临尾香就真係自己攞嚟。为免夜长梦多，今仗遇强敌曼城必以赢波3分为目标。车仔比其他争标劲敌优胜之处，除咗甚少喺弱旅身上失分之外，佢哋喺主场遇强愈强，自季初喺联赛以1比2不敌利物浦，车仔近4次喺史丹福桥球场面对Big 6球队，包括于联赛及英足盃两斗曼联，联赛迎战两大伦敦宿敌热刺及阿仙奴全部赢晒，认真有保证。 车仔王牌夏萨特一直受到西甲豪门皇马垂青，但上仗输畀水晶宫后，佢立即向外界回应转会传闻，话自己喺车仔好开心，希望留到2020年满约为止，近日更有指车仔想同佢续约至2022年添，呢位进攻核心喺大战前夕讲到明唔走，绝对有助稳定军心。 曼城客战硬嘢例脚软 相比之下，曼城今季作客可谓欺善怕恶，虽然上仗赛和阿仙奴2比2，但之前4次作客前7名球队，包括联赛斗爱华顿、利物浦及热刺，以及英联盃作客斗曼联全部输晒，睇嚟踢亲硬仗例脚软。主帅哥迪奥拿战术过于重攻轻守，以首循环主场对车仔为例，领先1粒大好形势下竟然下半场连失3球反输1比3，后防线无论史东斯或高拉洛夫都畀人迟钝及论尽之感，今仗造访急欲反弹嘅车仔，实在凶多吉少，2.25倍主胜有计。