曼联爱华顿细均力敌

战神围困难破铁桶阵 今晚英超加开快车，最强戏码梗係「5哥」曼联主场对「7哥」爱华顿。红魔虽有王牌伊巴谦莫域及悍将安达靴里拉坐完波监复出，但仍有成箩伤兵，其他球员如「福仔」拉舒福特等又唔争气，搞到前线死晒火，撞正硬淨嘅「拖肥糖」唔易食，今仗唔慌多波入，捧2.5球中位数嘅入球细好过。 （Now 621及LeSports HK应用程式周三凌晨3时直播） 福仔连格把握力曳 曼联虽然近19仗联赛保持不败，睇落好似好醒，但实际上喺呢19仗中和咗9仗，对争前4影响甚大，特别係主场出击仲频频失分，近5仗喺奥脱福球场出战嘅联赛只得1胜4和，呢5仗夹埋入得4球咁大把，全部总入球都唔过3粒，包括上仗遭西布朗闷和0比0，主帅莫连奴更闹爆前线嘅拉舒福特、安东尼马迪尔、连格及米希达利恩把握力坚曳。 红魔今仗有战神伊巴谦莫域及中场安达靴里拉刑满复出，似乎攻力会有所改善，因为伊巴係红魔前线最可靠王牌，但上面所讲5场比赛，伊巴亦4度披甲但仅入1球，反过来讲曼联太倚赖佢数胡，当佢畀人唛死嗰阵，就缺乏板斧破铁桶阵。加上依家有基斯史摩宁、菲尔锺斯、桑马达等伤兵唔踢得，其中桑马达更係进攻泉源。虽然天价中场保罗普巴已经复操，不过「寸王」主帅莫连奴话佢今仗能否赶及上阵都好难讲，令创造力进一步受削。 近4次访红魔少入波 另一边厢，爱华顿啱啱喺打吡战作客以1比3输畀利物浦，今仗继续作客；查实「拖肥糖」近6仗客场联赛赢得1场，相信今仗唔敢轻举妄动。翻查纪录，原来爱华顿近4次联赛造访红魔，当中3次总入球于2球或以下，以主帅朗奴高文咁鬼功利主义，唔会咁傻同你抢攻，既然主队冇火，客队又先求稳阵，入球细（2.5球）係最佳选择。